Anama şillə vurdular, sonra da... | Rusiyada dəhşətli işgəncəyə məruz qalan Vüqar Səfərov danışdı

Ötən gün Yekaterinburq şəhərində Rusiyanın Federal Təhlükəsizlik Xidmətinin saxladığı və sonradan sərbəst buraxdığı azərbaycanlılardan biri − Vüqar Səfərov hadisənin təfərrüatını danışıb.

Onun sözlərinə görə, iyunun 27-si səhər saat 05:00 radələrində evlərinin qapısı döyülüb: “Hər kəs maskada idi. Kim olduqlarını demədən bizi döydülər, anama şillə vurdular. Evi ələk-vələk axtardılar”.

V.Səfərov qeyd edib ki, onları daha sonra maşınlara mindirib aparıblar: “Maşında bizə palçıq yedirtdilər. “Sənin Rusiyada nə işin var? Niyə öz vətənində pul qazanmırsan?” deyirdilər. Təcridxanada isə bizi döyməyə və elektrik cərəyanı ilə işgəncə verməyə başladılar”.

O həmçinin atasına verilən işgəncədən danışıb.

“Atam ürəyində stend olduğunu desə də, qəsdən bədəninin həmin hissəsinə elektrik cərəyanı ilə işgəncə verirdilər. Onun bütün qabırğalarını qırdılar. Qardaşımla məni 17 saat saxladıqdan sonra atama “hamınızı öldürəcəyik, bu sənədə qol çəkib hər şeyi üstünə götürməlisən” dedilər. Atam da bizi buraxsınlar deyə məcburi hər şeyi üstünə götürdü”, − deyə V.Səfərov bildirib.