Bakı-Sumqayıt yolundakı yenilik tıxacı aradan qaldıracaq?

Bakı-Sumqayıt yolunun Xırdalan dairəsindən Bakı Beynəlxalq Avtovağzal kompleksinə qədər olan hissəsində avtobus zolağı çəkilib.

Bu yenilik müntəzəm marşrut xətlərinin rahat və maneəsiz hərəkətini təşkil etmək üçün nəzərdə tutulub.

Bəs Bakı-Sumqayıt yolunda çəkilən avtobus zolağı sıxlığı azaldacaqmı?

Nəqliyyat eksperti Rauf Ağamirzəyev məsələ ilə bağlı bildirib ki, əgər kompleks həllər olarsa, bu yenilik effekt verəcək: “Zolağa sərt nəzarət edilməlidir. Cərimə sanksiyası tətbiq olunmalıdır. Digər vacib məsələ isə həmin zolağın davamlılığıdır. Tutaq ki, Xırdalan dairəsindən avtovağzala kimidirsə, onu “20 Yanvar” metro stansiyasına kimi uzatmaq lazımdır”.

Yerüstü Nəqliyyat Agentliyindən bildirilib ki, qeyd olunan yoldan gün ərzində ümumilikdə 37 müntəzəm marşrut xətti üzrə avtobus keçir. Zolağın tələbinə əməl etməklə 140.000-ə yaxın ictimai nəqliyyat istifadəçisinin rahat, maneəsiz və vaxt itirmədən daşınması mümkün olacaq.