Bir insanın cənnətə və ya cəhənnəmə gedəcəyi öncədən bəllidir? - AMİN

Baku TV-nin “Amin” verilişinin yeni buraxılışı yayımlanıb.

Verilişin budəfəki sayında şair Səlim Babullaoğlu və ilahiyyatçı Ağa Hacıbəyli ilə tale mövzusu müzakirə olunub.

A.Hacıbəyli yaşadığımız kainatın Rəbbimizin sənət əsəri olduğunu qeyd edərək bildirib ki, Allah qədər cizgisi içərisində insana azadlıq verib:

“Bu azadlığın içərisində bir məsuliyyət var. Çünki halal da, haram da, şər də, xeyir də bəllidir. Əslində, hər şey bizi sonda Allaha aparır. Amma bunun hansı seçimlə baş verdiyi əsasdır. Doğulduğumuz ailəni, dərimizin rəngini, milliyyətimizi, zamanımızı özümüz seçməmişik. Lakin dünyaya gəldikdən sonra bizə seçim imkanı verilir və əlimizdən alınmır”.

Aparıcının “əgər insanın cənnətə, ya cəhənnəmə düşəcəyi bəllidirsə, o, niyə doğru yola çağırılır” sualına Səlim Babullaoğlu belə cavab verib:

“Allahdan başqa heç kimə heç nə bəlli deyil. Hətta ruhanilər belə sona qədər Allahın sirrini bilmirlər. Qədərin olduğuna inanıram və biz robot deyilik. Düşünürəm ki, dua ilə öz qədərimizə və hadisələrin gedişatına təsir edə bilərik”.