Dabaq xəstəliyi hansı hallarda insana keçir?

Son günlər ölkə ərazisində dabaq xəstəliyinin geniş yayılması ciddi narahatlıq doğurur.

Peyvəndləmə aparıldığı halda xəstəliyin kütləvi hal alması ilə bağlı Kənd Təsərrüfatı Nazirliyindən açıqlama verilib.

Kənd Təsərrüfatı Nazirliyinin şöbə müdiri Bayandur Rzayev bildirib ki, 2023-cü ilə qədər dabağın üç serotipinə qarşı peyvəndlənmə aparılıb:

“Həm bizim yerli mütəxəssislər, həm də Ümumdünya Səhiyyə Təşkilatı və qonşu ölkələrdə dövr edən xəstəliklər araşdırıldıqdan sonra peyvəndlənmənin tərkibinə beşinci serotip də əlavə olunacaq. Bu, xüsusi təhlükəli xəstəlik olduğu üçün artıq illərdir peyvəndləmə aparılır. Çox güman ki, hazırkı yayılma yeni tip serotiplə bağlıdır”.

Bayandur Rzayev qeyd edib ki, dabağın insanlara keçmə ehtimalı çox aşağıdır: “Yalnız heyvan mənşəli məhsullar, xüsusilə ət və süd məhsulları yarımbişmiş halda qəbul edildikdə, yoluxma riski yaranır. Amma indiyə qədər Azərbaycanda bu xəstəliyə insan yoluxması halı qeydə alınmayıb”.

Onun sözlərinə görə, xəstəlik əsasən hava-damcı və su vasitəsilə yayılır: “Əgər heyvanda dabaq aşkar olunubsa, mütləq şəkildə ağzı soda və ya əhəng məhlulu ilə yuyulmalıdır. 1-2 dəfə tətbiqdən sonra əlamətlər azalır. Dabaqda spesifik müalicə üsulu yoxdur, ölüm halları çox azdır, lakin məhsuldarlığa təsir göstərir. Hazırda yoluxma sayında azalma müşahidə olunur. Xəstəliyin inkubasiya və sağalma dövrü 15-20 gün çəkir”.

B.Rzayev fermerlərə tövsiyə edib ki, heyvanların temperatur rejimini düzgün tənzimləsinlər, bu halda ölüm hallarının qarşısı tam alına bilər.

Qeyd edək ki, Qida Təhlükəsizliyi Agentliyi dünyanın bəzi ölkələrində, o cümlədən Türkiyədə dabaq xəstəliyinin sürətlə yayılması səbəbilə oktyabrın 25-dən etibarən ölkədə heyvan bazarlarının fəaliyyətinin müvəqqəti dayandırılacağını açıqlayıb.