Daxili işlər naziri Şəkidə vətəndaş qəbulu keçirdi | 312 vətəndaşın müraciəti dinlənildi

Daxili işlər naziri general-polkovnik Vilayət Eyvazov Şəkidə vətəndaş qəbulu və sıra baxışı keçirib.

Bu barədə Daxili İşlər Nazirliyindən məlumat verilib.

Qeyd edilib ki, Şəki Şəhər-Rayon Polis Şöbəsində Şəki, Balakən, Zaqatala, Qax, Oğuz, Qəbələ şəhər və rayonlarından qəbula gələn 312 vətəndaşın müraciətini dinləyən nazir onların problemlərinin həlli üçün Nazirliyin aidiyyəti baş idarə və idarə rəislərinə tapşırıqlar verib. Müraciətlərin əksəriyyətinin yerində həlli ilə bağlı tədbirlər görülüb.

Səfər çərçivəsində general-polkovnik Vilayət Eyvazov bölgə üzrə polis orqanlarında sıravi və kiçik rəis heyətinə xidmətə qəbulla bağlı sıra baxışı keçirib.

Vətən müharibəsinin 34 iştirakçısının da qatıldığı sıra baxışında xidmətə qəbulun şərtlərinə uyğun gələn 198 nəfər seçim turunun növbəti mərhələsinə buraxılıb.