Elm-din "savaş"ı: modern insanı bəlaya salan nədir? - Elm niyə hər şeyi izah edə bilmir? | AMİN

“Amin” verilişinin yeni buraxılışında ilahiyyatçı Elnur Əzimli və Krişna Şüuru Cəmiyyətinin sədri Ramil Cəbrayıllı ilə modern insanın mənəvi problemləri barədə fikir mübadiləsi aparılıb.

Elnur Əzimli “Modern insan kimdir?” sualını belə cavablandırıb:

“Bu suala cavab vermək üçün əvvəlcə modernizmin nə olduğunu anlamalıyıq. Modernizm XVIII əsrdən etibarən Avropada ortaya çıxmış bir düşüncə tərzidir. Burada rasional düşüncəyə xüsusi önəm verilir. Yəni hər şey ağılla ölçülməlidir. Ağla uyğun gəlməyən məsələlərin həqiqət kimi qəbul edilməsi mümkün deyil. Bu kontekstdə dinin elə xüsusiyyətləri var ki, onları ağılla izah etmək və ya tam şəkildə anlamaq olmur. Məhz buna görə də müasir insan bu anlayışları qəbul etmir”.

Ramil Cəbrayıllı isə xoşbəxtlik anlayışından danışıb:

“Bu dünyada tam mənada xoşbəxt olmaq mümkün deyil. İmkanlı insanlara kənardan baxanda “bu, varlıdır, yəqin ki, çox xoşbəxtdir” deyirlər. Amma onların da daxilində bir narahatlıq var. Həmin şəxslərin xoşbəxtliyi də müəyyən həddə qədərdir. Maddi dünyada xoşbəxtliyin həm başlanğıcı, həm də sonu var. Hər şeyə sahib olan insanlar belə bu dünyanı bir müddət sonra mənasız görürlər”.