“İndi xeyir və şər tərsinə çevrilib” | İblis Allaha inanırdısa, niyə üsyan etdi? - AMİN

“Amin” verilişinin yeni buraxılışında ilahiyyatçı Elnur Əzimli ilə iblis və şər mövzusu müzakirə olunub.

O, dünya həyatının bir sınaq meydanı olduğunu bildirib:

“Dünya həyatı bizə verilmiş bir fürsətdir. Axirəti qazanmaq üçün Allaha qarşı səmimi olmalı, iblisin hiylələrinə aldanmamalı və qarşılaşdığımız çətinliklərə səbirlə yanaşmalıyıq. Şərin mahiyyətini görmədən xeyrin nə olduğunu anlamaq qeyri-mümkündür. Cənnət nemətlərinin dəyərini bilmək üçün bu dünyadakı sınaqlardan keçməliyik”.

İlahiyyatçı həmçinin din sahəsindəki daxili çəkişmələrin gətirdiyi fəsadlara toxunub:

“Biz daxilimizdə fitnə-fəsada düşəndə şər qüvvələr daha sistemli şəkildə fəaliyyət göstərir və insanları Allahın yolundan döndərmək üçün hər cür vasitədən istifadə edirlər. Təəssüf ki, günümüzdə din sahəsinə yönələnlərin bir çoxunun intellektual səviyyəsi yüksək deyil. Onlar dünyanı yalnız kiçik qruplarından ibarət hesab edirlər. Eyni zamanda özlərindən fərqli düşünən digər dindarları tənqid edir, onlara düşmən kəsilir və aralarında daxili münaqişələr yaradırlar”.