Haramı da yaradan Allahdır, istəsə... | İnsan Allahdan qorxmalıdır? - AMİN

“Amin” verilişinin yeni buraxılışı yayımlanıb.

Proqramda şair, yazıçı Qəşəm Nəcəfzadə və ilahiyyatçı Ağa Hacıbəyli ilə təkəbbür və təvazökarlıq mövzusu müzakirə edilib.

Təkəbbürün mənəviyyat yolunda əngəl olduğunu deyən Ağa Hacıbəylinin sözlərinə görə, onu aşmaq çox çətindir:

“Bütün peyğəmbərlərin haqq, tövhid mübarizəsində önlərindəki ən böyük əngəl məhz təkəbbür olub. Onun dərinliyinə vardığımız zaman görürük ki, kökündə iblis dayanır. Kainatda ilk üsyan da təkəbbürlə başlayıb. İnsanın fitrətində böyüklüyə aid bir şeylər var, önəmli olan onları düzgün idarə etməkdir”.

Qəşəm Nəcəfzadə isə bildirib ki, insanın özünü təkəbbürlü göstərməsi onun məğlubiyyətinə gətirib çıxarır.

“Bütün yaradılmışlar Allaha məxsusdur. Mənfini, müsbəti, şeytanı, mələyi də Allah yaradıb. Onun yaratdıqlarının hamısı gözəldir. Həmişə deyirlər ki, Allahdan qorxun. Mən Yaradandan qorxmuram. Allahı çox istəyirəm. Məni qoruyan, alın yazımı yazan Allahdır”, − deyə o, sözlərinə əlavə edib.

Qəşəm Nəcəfzadənin sözlərinə görə, şeytan bəzən insanı iş görməyə təhrik edən qüvvədir:

“Bir gün Azərbaycan Yazıçılar Birliyində tədbirlərdən birində iştirak edirdim. Orada tədbiri açan adam dedi ki, şeytana uymayın, Allah ona lənət etsin. Həmin müəllifin kitabı başdan sona şeytanı təhqir etməklə keçdi. Mən isə vəziyyəti dəyişməkdən ötrü şeytana çox böyük sevgimin olduğunu söylədim. Çünki o, bəzən insanı iş görməyə təhrik edən bir qüvvədir”.