İkinci dəfə dünyaya qayıtdığım gün doğum günümdür | Qazi Süleyman Süleymanov

Yaralı halda 6 gün şəhid olan döyüşçü yoldaşlarının yanında qalıb, öldüyü zənn edilərək tabuta qoyulub. Lakin sonradan sağ olduğu məlum olub.

Söhbət Vətən müharibəsi qazisi Süleyman Süleymanovdan gedir. Qubanın İkinci Nügədi kəndindən olan Süleyman Vətən müharibəsi başlayan kimi döyüşlərə atılıb.

Füzuli, Cəbrayıl, Xocavənd istiqamətində gedən döyüşlərdə iştirak edən Süleyman yaralanmasından bəhs edib:

“Oktyabrın 20-də Xocavənd istiqamətində – Üçtəpədə artilleriya atəşi nəticəsində vuruldum. Oradan bizi Cəbrayıldakı hərbi məntəqəyə çatdırılan zaman tibbi maşınımız yolda atəşə tutuldu. 6 nəfər idik. Vurulduğum yerdə üç gün şəhidlərimizlə birlikdə qaldım”.

Süleymanın sözlərinə görə, valideynlərinə zəng edib deyiblər ki, oğlunuz şəhid olub:

“Sonra təsadüf nəticəsində görüblər ki, nəbzim vurur. Ondan sonra valideynlərimə zəng vurub deyiblər ki, oğlunuz sağdır, gözünüz aydın. Müalicələrimi davam etdirirəm, 3-cü qrup əliləm. 26 oktyabr ikinci dəfə dünyaya qayıtdığım gündür. Bu günü doğum günüm kimi qeyd edirəm”.

Ailənin yeganə oğul övladı olan Süleyman Süleymanov Cəbrayılın, Xocavəndin, Füzulinin azad olunmasına görə medalları ilə təltif edilib.