İrandan gətirilən 24 tona yaxın yararsız kartof məhv edilib

İran və Belarusun bəzi ixracatçılarına Azərbaycana məhsul idxalına müvəqqəti qadağa qoyulub. Qida Təhlükəsizliyi Agentliyindən bildirilib ki, məhdudiyyət portağal və kartof gətirilməsinə tətbiq edilib.

“İran İslam Respublikasından idxal olunan portağal məhsullarında 63 halda sitrus tristeza virusu, Belarus Respublikasından idxal edilən ərzaqlıq kartof məhsullarında isə 44 halda kartof yumrularında halqavari bakterial çürümə və 1 halda kartofun qonur çürümə bakteriyası aşkar edilib.

İranın 5, Belarusun isə 4 ixracatçısının Azərbaycana məhsul idxalına 2023-cü il 5 aprel tarixindən müvəqqəti qadağa qoyulması qərara alınıb”, - deyə qurumun məlumatında deyilir.

Həmçinin fiziki şəxs Əhməd Tağıyevin İrandan idxal etdiyi 23 700 kq ərzaqlıq kartofda karantin tətbiq edilən fitopatogen bakteriyalar – kartofun qonur çürüməsi aşkarlanıb. Yararsız məhsul tullantılar üçün nəzərdə tutulmuş xüsusi poliqonda məhv edilib.