Kimlər məcburi köçkün statusunu itirə bilərlər? - Baku TV

Azərbaycan dövləti məcburi köçkünlərlə bağlı yeni hüquqi mərhələyə keçməyə hazırlaşır.

İllərlə işğal altında qalan torpaqlar artıq azaddır. Dövlət həmin ərazilərdə şəhərlər, kəndlər salır, evlər tikir, infrastruktur qurur və vətəndaşların doğma yurdlarına qayıdışı üçün şərait yaradır.

Məhz bu reallıq fonunda Milli Məclisdə müzakirəyə çıxarılan qanun dəyişiklikləri məcburi köçkünlərə mühüm bir mesaj verir: əgər dövlət sizi əvvəlki yaşayış yerinizin əvəzinə evlə təmin edibsə və ya doğma yurdunuza qayıtmaq üçün bütün şəraiti yaradıbsa, həmin təklifdən imtina etmək artıq məcburi köçkün statusunun saxlanılması üçün əsas sayılmayacaq.

Başqa sözlə, vaxtilə insanları öz yurdlarından didərgin salan səbəblər aradan qalxıb. Torpaqlar azad edilib, yaşayış məntəqələri bərpa olunur və dövlət qayıdış imkanını təmin edir. Bu halda vətəndaşın qayıdıb-qayıtmamaq qərarı artıq onun şəxsi seçiminə çevrilir.

Yeni dəyişikliklərin mahiyyəti də məhz bundan ibarətdir. Dövlət deyir ki, əgər sənə yaşayış yeri təqdim olunubsa, qayıdış üçün imkan yaradılıbsa, lakin sən öz seçiminlə bundan imtina edirsənsə, artıq məcburi köçkün statusunu daşımaq üçün hüquqi əsas qalmır.

Qanun layihəsinə əsasən, dövlət tərəfindən təqdim edilən yaşayış yerindən imtina edən şəxslər məcburi köçkün statusunu itirə bilərlər. Eyni zamanda sosial müdafiə tədbirləri də statusun itirildiyi tarixdən sonra üç il müddətində davam edəcək.

Dəyişikliklərin arxasında duran əsas məntiq isə aydındır. Bir vaxtlar işğal səbəbindən məcburi köçkün düşən insanların doğma torpaqlarına qayıdışı üçün maneələr aradan qaldırılıb. Dövlət öz öhdəliyini yerinə yetirərək yeni evlər tikib, qayıdış proqramları hazırlayıb. Bu baxımdan qayıdış imkanı yaradıldığı halda məcburi köçkün statusunun davam edib-etməməsi vətəndaşın öz seçimi ilə əlaqələndiriləcək.