Millət vəkili Tahir Kərimlidən iddia ilə bağlı açıqlama

Azərbaycanda ailə qurmayan 30 yaş üstü şəxslərdən vergi alınması təklif olunur.

Sosial şəbəkələrdə bu təklifi millət vəkili Tahir Kərimlinin verdiyi bildirilib.

Tahir Kərimli yayılan məlumatı təkzib edib: “Mən 30 yaşdan yuxarı ailə qurmayan insanların ümumiyyətlə subaylıq vergisinə və digər vergilərə cəlb olunması haqqında heç bir təklif verməmişəm. Məndən soruşanda ki, “Türkiyədə belə bir təklif irəli sürülüb, siz necə baxırsınız?”, demişəm ki, mən buna razı deyiləm, ictimai rəy bunun əleyhinədir”. 

Millət vəkili xəbəri təkzib etsə də, mətbuata açıqlamasında Azərbaycanda əvvəllər “subaylıq vergisi” olduğunu da xatırladıb.

Qeyd edək ki, keçmiş SSRİ-də 1941-ci ilin noyabr ayından subaylıq vergisi tətbiq olunurdu. Bu məbləğ əmək haqqının 6 faizini təşkil edirdi. Vergini 20-50 yaşınadək uşaqsız kişilər və 20-45 yaşınadək uşağı olmayan ərli qadınlar ödəyirdilər.

Daha uzaq tarixə nəzər salanda isə məlum olur ki, Romanın ilk imperatoru 38 yaşından yuxarı subay kişilərə “subaylıq vergisi” tətbiq edirdi. Bənzər vergilər tarix boyu tətbiq edilib. 1695-ci ildə İngilis parlamenti 25 yaşından yuxarı subaylara və övladsız şəxslərə vergi tətbiq edib.