Milyonlarla zərərə uğrayan sahibkarlar danışdı: yanğın barədə detallar

“Bir milyon yarımlıq malım qısa zamanda kül oldu”.

Bunu Bakıda inşaat materialları bazarında baş verən yanğından zərər çəkən sahibkar Əmrah Cəfərov deyib.

Onun sözlərinə görə, yanğın başladıqdan qısa zaman sonra küləyə görə güclənib:

“Bir anın içində alov gücləndi. Yanğınsöndürənlər tez gəlsə də, güclü külək yanğını daha da şiddətləndirdi. Qısa müddətdə bir milyon yarımlıq əmlakım kül oldu. Dünən axşam bir vaqon mal gətirmişdim, onlar da kül oldu. Obyektim 800 kvadrat metrə yaxın idi. Obyektlərimin sığortası var. Yəqin istintaqla müəyyənləşdirəcək ki, kimdir günahkar, bizim də hüquqlarımız təmin olunacaq”.

Digər sahibkar İntiqam Kərimov isə bildirib ki, yanğın zamanı 140-150 min manat ziyana düşüb: “Mənim obyektim təqribən 300-400 kvadrat metri əhatə edir. Hər şey kül olub. Sığorta ilə bağlı müraciət etməmişik. Ümumiyyətlə, sığorta ilə bağlı heç kim bizə məlumat verməyib”.