Moped və motosiklet sürücülərinə xəbərdarlıq

Yaz mövsümü ilə əlaqədar havanın isti keçməsi bəzi moped və motosiklet idarə edən şəxslərin təhlükəsizlik qaydalarına məsuliyyətsiz yanaşmaqla, xüsusən də motodəbilqədən müxtəlif bəhanələrlə istifadə etmədən idarəetmə halları çoxalıb.

Bu barədə Bakı Şəhər Dövlət Yol Polisi İdarəsinin əməkdaşı, polis mayoru Araz Əsgərli bildirib.

A.Əsgərli vurğulayıb ki, motodəbilqədən istifadə etməmək inzibati məsuliyyət formalaşdırmaqla yanaşı, yol-nəqliyyat hadisəsi zamanı təhlükəsizliyin təmin olunması riskini artırır. Bu da ən ağır yol-nəqliyyat hadisələrində faciələrə yol açır.

“Bütün moped və motosiklet idarə edən sürücülərdən, eləcə də onların sərnişinlərindən nəzərdə tutulan qaydalara ciddi riayət etməyi, özlərinin və sərnişinlərin həyat və sağlamlığına biganə qalmamağı xahiş edirik. Motodəbilqədən istifadə etməyən sürücülərin İnzibati Xətalar Məcəlləsinin 329.2-ci və 338.4.4-cü maddələrinə əsasən 40 manat, sərnişinləri isə 338.3-cü maddəyə əsasən 30 manat məbləğində cərimə olunmaqla məsuliyyətə cəlb edilməsi qanunla nəzərdə tutulur”, – deyə A.Əsgərli qeyd edib.