“Ölü yiyəsi dedi ki...” - Hansı məşhurun məzarında gördükləri Rövşəni şoka saldı? - ARZUNUN VAXTI

“Arzunun vaxtı” verilişinin budəfəki qəhrəmanı baxımsız qalan məzarları könüllü şəkildə təmizləyən və təmir etdirən Rövşən Novruzov olub.

Rövşən bildirib ki, qəbiristanlıqlarda ot basmış, çatlamış və çökmüş məzarları gördükdə laqeyd qala bilmir.

O bu işə ilk dəfə mərhum meyxanaçı Vüqar Biləcərinin məzarını təmizləməklə başladığını deyib:

“İlk dəfə Vüqar Biləcərinin qəbrindən başladım. Ürəyimdən gəldi, gedib məzarını silib-təmizlədim və sosial mediada paylaşdım. Bundan sonra özümdə bir fikir yarandı ki, gedib kimsəsiz və baxımsız qalan digər məzarları da təmizləyim”.

O, təmizlədiyi məzarların sahiblərindən bəzilərinin ona təşəkkür etdiyini, bəzilərinin isə əksinə, narazılıq göstərdiyini bildirib. Hətta məzarın vəziyyətini lentə alıb paylaşdığı üçün onu polislə hədələyənlər də olub:

“Ölü yiyəsi dedi ki, videonu silməsən, səni polisə verəcəyəm. Dedim, yaxşı, silərəm. Üç-dörd ay sonra gedib baxıram ki, məzar yenə əvvəlki pis vəziyyətində qalıb. Məzarın o vəziyyətdə olmasından utanmırlar, amma mənim çəkib göstərməyimdən utanırlar”.

Rövşən məşhurlardan mərhum müğənni Şəfanın məzarının vəziyyətini gördükdə də şoka düşdüyünü deyib:

“Şəfanın məzarını ilk dəfə görəndə dəhşətə gəldim. Düşündüm ki, belə tanınmış bir müğənninin məzarı necə bu vəziyyətdə qala bilər? Müğənni dostları və sənət yoldaşları gəlib məzarını təmizləyə bilərdilər. Amma onunla duet oxuyan, bacı-qardaş kimi yaxın olan şəxslərin heç biri məzarının yerini belə tanımır”.