Paytaxtın hansı ərazilərində evlərin qiyməti artıb? | Ekspertlər bahalaşmadan danışdı

Bakıda mənzil bazarında qiymət artımı müşahidə olunur. Bahalaşmanı statistik göstəricilər də təsdiq edir.

Azərbaycan Qiymətləndiricilər Cəmiyyətinin məlumatına görə, 2025-ci ilin fevral ayında Bakıda mənzillərin qiyməti yanvar ayı ilə müqayisədə orta hesabla 1,5 faiz, 2024-cü ilin eyni dövrünə nisbətən isə 11,2 faiz artıb.

Ekspertlər bahalaşmanı ipoteka kreditləri üçün müraciətlərin başlanılması ilə izah edirlər.

Belə ki, fevralın 6-dan başlayaraq bununla bağlı prosesə start verilib.

“İpoteka kreditlərinin verilməsi səbəbindən əmlak bazarında ciddi şəkildə müştəri çoxluğu var. Onlar daha çox ipotekaya yararlı, çıxarışlı əmlaklara müraciət edirlər.

Hazırda köhnə tikililərdən 9 mərtəbəli binalara, yeni tikili binalarda isə çıxarışlı əmlaklara tələbatın artması onların satış qiymətlərində bahalaşmaya səbəb olur”, – deyə daşınmaz əmlak eksperti Elnur Fərzəliyev mövzu ilə bağlı Baku TV-yə açıqlamasında bildirib.

Qiymətləri yüksək olan və ipotekaya yararsız əmlaklarda bahalaşma müşahidə olunmayıb. Mütəxəssislər belə evlərin satışında durğunluğun müşahidə olunduğunu deyirlər.