Polisdən moped sürücülərinə xəbərdarlıq

“Son vaxtlar əksər vətəndaşlar moped sürücülərindən şikayət edir”. Bu barədə Baş Dövlət Yol Polisi İdarəsinin moped sürücülərinə xəbərdarlığında bildirilib.

İdarənin şöbə rəisi Rövşən Tağıyevin sözlərinə görə, moped sürücüləri tıxaclarda təhlükəli manevrlər edir, heç bir təhlükəsizlik avadanlıqlarından istifadə etmir, yol hərəkəti qaydalarını bəzən kobud şəkildə pozurlar:

"Moped sürücülərinin çoxu kuryer xidməti ilə məşğul olur. Hər zaman harasa tələsən bu sürücülər bəzən həm öz həyatlarını, həm də digər sürücülərin həyatlarını təhlükə altında qoyurlar. Belə hallar isə sonda ölüm və xəsarətlə nəticələnə bilir. Bütün moped sürücülərindən tələb edirik ki, mopedlərdən istifadə zamanı təhlükəsizlik avadanlıqlarından istifadə etsinlər".

O da qeyd edilib ki, fevralın 1-də “Yol hərəkəti haqqında” qanuna edilən dəyişikliklə mühərrikin həcmindən asılı olmayaraq, maksimal sürəti saatda 50 km-dən artıq olan bütün növ mexaniki nəqliyyat vasitələrinin dövlət qeydiyyatına alınması barədə qərar verilib.

Qurum rəsmisi həmçinin moped sürücülərini kobud qayda pozuntularına yol verərək özləri və digər hərəkət iştirakçıları üçün təhlükə yaratmamağa çağırıb.