Qızımın anasız qalmasından qorxuram | Xocalı əsiri Dürdanə Ağayevanın son durumu | ARZUNUN VAXTI

“Yaxşı idim, Xocalıya gedəndən sonra pis günə düşdüm”.

Bunu Baku TV-də yayımlanan “Arzunun vaxtı” verilişində Xocalı faciəsinin şahidi Dürdanə Ağayeva deyib.

4 ildir xərçəng xəstəliyindən əziyyət çəkən D.Ağayeva vəziyyətinin pisləşdiyini bildirib:

“Artıq gəzə bilmirəm, ayaqlarım əsir. Üç gün əvvəl komaya düşdüm, neçə saat özümə gələ bilməmişəm. Ağrılarım çox olur, nevroloji problemlərim də var. Komaya düşməyim bununla əlaqədardır. Danışmağa da çətinlik çəkirəm. Halbuki mən 17 yaşından telefonçu işləyirdim, dilimə dil çatdırmaq olmurdu”.

Səkkiz gün əsirlikdə qalan Xocalı sakini xəstəliyinin Qarabağda çəkdiyi əziyyətlərin, qorxunun, həyəcanın nəticələri olduğunu deyib:

“Çox əziyyətlər çəkmişəm. Mən orada çox işgəncələr gördüm. 20 yaşlı qız düşmən qabağında qorxu yaşamasın, nə etsin? Mən əsir düşməsəydim, bəlkə də, bu qədər xəstəlik daşımazdım. Şəkər xəstəsiyəm, onurğamda 2 kilo dəmir var. Hamısı da Qarabağın, ermənilərin işgəncələrinin fəsadlarıdır”.

Ölümdən qorxmadığını deyən D.Ağayeva qızının anasız qalmasından narahat olduğunu söyləyib:

“Ölüm haqdır, bir gün gələn bir gün gedəcək. Bircə şeydən qorxuram, övladımın tək qalmağından. Ləmanım anasız qalmasın. Balamın məndən başqa heç kimi yoxdur. Onu mənsiz təsəvvür edə bilmirəm. Özümün yaşayıb-yaşamağım məni heç maraqlandırmır, amma övladıma görə narahat oluram. O qız mən hər dəfə pis hala düşəndə göz yaşlarına dözə bilmirəm”.