"6 azərbaycanlı, 6 türkiyəli əsgər orada..." | 2 minə yaxın şəxsin qətlə yetirildiyi rayon - Baku TV

1918-ci ilin mart-aprel aylarında erməni-bolşevik silahlıları tərəfindən Azərbaycan xalqına qarşı törədilən soyqırımı aktları təkcə Bakı şəhəri ilə məhdudlaşmayıb. Hacıqabul rayonu ərazisində də kütləvi qətliamlar, talanlar və dağıntılar törədilib.

Tarixçi Məhəmməd İsayev bildirir ki, həmin dövrdə Hacıqabul rayonunun müxtəlif kəndlərində ümumilikdə 2000-ə yaxın dinc sakin qətlə yetirilib. Faciənin ən ağır fəsadları isə Navahı kəndində qeydə alınıb. Bu kənddə 1000 nəfərə yaxın soydaşımız erməni vəhşiliyinin qurbanı olub.

Tarixçinin sözlərinə görə, Navahı kəndində itkilərin bu dərəcədə böyük olmasının səbəbi strateji nöqtə olan dəmir yolu stansiyası ilə bağlı olub. Bolşevik və daşnak birləşmələri əhalini aldadaraq guya təhlükəsizlik məqsədilə onların silahlarını yığacaqlarını və heç bir zorakılıq edilməyəcəyini vəd ediblər. Lakin əhali silahsızlandırıldıqdan sonra xaincəsinə kütləvi qırğınlar törədilib. Navahıdan sonra eyni ssenari Qubalı kəndində də təkrarlanıb:

“Onilliklər boyu Sovet ideologiyası bu qanlı hadisələri xalqın yaddaşından silməyə, tarixi faktları ört-basdır etməyə çalışıb. Lakin müstəqillik illərində aparılan tədqiqatlar nəticəsində həqiqətlər üzə çıxıb. Həmin ərazidə aparılan qazıntılar zamanı kütləvi məzarlıq aşkar edilib. Orada 6 türk və 6 azərbaycanlı əsgərin nəşi tapılıb”.