"Report"un uğurunun sirri | Xəbər agentliyi 10 yaşını qeyd edir

Keyfiyyət sağlamlığın, əməyin təhlükəsizliyi və ətraf mühitin mühafizəsi üzrə siyasətin düsturudur.

“Report” bu düsturu fəaliyyətinin istənilən sahəsində siyasətinə çevirib. 10 yaş o qədər də böyük səslənməsə də, möhkəm təməlin göstəricisidir.

“Report” son 10 ildə həm də nümunə ola bilib. Hadisə və proseslərə operativ, obyektiv yanaşma tərzi ona geniş oxucu auditoriyası qazandırıb. “Report” rəqabət aparmayıb, rəqabətin səbəbinə çevrilib.

Bu çətin, lakin şərəfli yolda oxucunun da maraq dairəsində və diqqət mərkəzində olmaq peşəkarlıq tələb edirdi. Dəqiq, qərəzsiz xəbər hazırlamaq, ölkədə və qlobal arenadakı hadisə və informasiyalardan ən operativ və doğru məlumatı hazırlamaq, daim inkişaf edən multimedia ilə ayaqlaşmaq, günün nəbzini tutmaqla “Report” 10 ildə uğurun strategiyasını hazırlayıb.

İnformasiya müharibəsinin qalibi olmaq və bu mübarizədə rəqibləri üçün əsl nümunə olan “Report” komandası fasiləsiz çalışıb, çalışır və görünən odur ki, dayanmayacaq.

“Global Media Group” holdinqin tərkibinə daxil olan “Report” İnformasiya Agentliyi dünyaya bu 10 ildə informasiyanı həm də ingilis və rus dilində çatdırıb. Azərbaycanlı oxucular isə məhz Azərbaycan dilinin bütün qrammatik normalarında “Report”dan operativ və səhih xəbəri izləyib.

Bu gün hesabat yaşının ən gözəl dövründə olan “Report”un 6 ölkədə – Türkiyə, ABŞ, Fransa, Rusiya, Ukrayna, Gürcüstanda müxbirləri fəaliyyət göstərir. Ölkəmizin müxtəlif bölgələrində 10 müxbir məntəqəsi var.

Hər gün “Report.az” saytında 3 dildə 600-dən çox xəbər dərc edilir. Hər ay 1 milyondan artıq izləyici xəbərləri məhz “Report.az” saytından alır. “Report”un sosial şəbəkələrdə izləyicilərinin sayı 500 mindən çoxdur. Paylaşımların əhatə dairəsi isə 10 milyon insan təşkil edir.