"Uşağa məni göstərib dedi ki, sözə baxmasan, belə olacaqsan" - Paralimpiyaçı Rəsul | ARZUNUN VAXTI

“Arzunun vaxtı” verilişinin budəfəki qəhrəmanı əlilliyi olan paralimpiyaçı Rəsul Zəkiyev olub.

O, fiziki məhdudiyyətli insanlara lağ edənləri qınayıb:

“Məni başqalarından fərqləndirən xarici görünüşümdür, ruhən hamımız eyniyik. Valideynlərim heç vaxt mənə fiziki məhdudiyyətli olduğumu hiss etdirməyiblər. Bəzən elə olur ki, uşaqlar mənə gülür, lağ edirlər. Onları ciddiyə almıram. Amma elə fiziki məhdudiyyətli insanlar var ki, belə davranışlara görə travma alırlar. Uşaqların bu cür hərəkətlərinin günahkarı valideynlərdir”.

Rəsul Zəkiyev həmçinin uğurlarından bəhs edib:

“11-12 yaşımdan parapauerliftinq ilə məşğulam. 2023-cü ildə Birləşmiş Ərəb Əmirliklərinin Dubay şəhərində baş tutan parapauerliftinq üzrə dünya çempionatı ilk yarışım idi. Orada yeniyetmələr arasında dünya çempionu oldum. 2025-ci ilin oktyabr ayında isə sözügedən idman növü üzrə Misirdə baş tutan dünya çempionatında gənclər arasında dünya çempionu oldum. Heç vaxt əlilliyim olduğuna görə məyus olmamışam. Çətinliklərlə qarşılaşanda onları dəf etməyə çalışmışam”.