"Yazıqlar inanırlar..." | Toyuqları rəngləyib "kənd toyuğu" adı ilə satırlar? - Baku TV

Son günlər Xırdalanda fəaliyyət göstərən toyuq kəsimi sexlərindən birində aparılan yoxlamalar ciddi pozuntuları üzə çıxarıb.

Məlum olub ki, sahibkar mənşəyi məlum olmayan toyuq məhsullarını kimyəvi maddələrlə rəngləyərək “kənd toyuğu” adı altında satışa çıxarıb. Bu fakt bazarlarda satılan toyuq məhsullarının keyfiyyəti və rəngi ilə bağlı narahatlıqları bir daha gündəmə gətirib.

Məsələnin mahiyyətini araşdırmaq üçün Baku TV-nin çəkiliş qrupu bazarlardan birində olub.

Satıcılardan biri məhsulların Hövsan mənşəli olduğunu iddia edərək toyuqların inkubatorda çıxmasına baxmayaraq, həyətdə saxlanıldığını və rənglərinin təbii olduğunu bildirib.

Qida eksperti Məhsəti Hüseynova isə qeyd edib ki, bu cür rəngləndirici maddələrin istifadəsi təkcə istehlakçı hüquqlarının pozulması deyil, eyni zamanda ciddi sağlamlıq riskləri yaradır.

Onun sözlərinə görə, toyuqları kənd toyuğuna bənzətmək üçün sarımtıl maddələrlə rəngləmə aparılır, bəzən isə məhsulun köhnə olmasını gizlətmək məqsədilə qanlı hissələrin üzəri kimyəvi maddələrlə örtülür:

“Bu maddələr keyfiyyətsiz məhsulun satışına şərait yaradır və insan orqanizminə toksiki təsir göstərə bilər”.