Regionun ekoloji bərpasında mühüm rol oynayan “Suqovuşan” su anbarı - Baku TV

Uzun illər işğal altında qaldıqdan sonra bərpa edilən “Suqovuşan” su anbarı artıq təkcə texniki obyekt deyil, regionun ekoloji dirçəlişində mühüm rol oynayan strateji həyat mənbəyinə çevrilib.

Tərtər və ətraf rayonlarda minlərlə hektar əkin sahəsi məhz bu su anbarı hesabına suvarılır. Bu isə həm kənd təsərrüfatının inkişafına, həm də ekoloji tarazlığın qorunmasına mühüm töhfə verir.

Tərtərçay Hidroqovşağı İstismarı İdarəsinin baş mühəndisi Hafiz Səfərov bildirib ki, erməni işğalı dövründə su anbarı istismar olunmadığından obyekt tamamilə bərbad vəziyyətə düşmüşdü.

Azərbaycan Ordusunun 2020-ci ildə qazandığı tarixi qələbədən sonra ərazidə genişmiqyaslı yenidənqurma və əsaslı təmir işlərinə başlanılıb.

Onun sözlərinə görə, 2023-cü ildə “Suqovuşan” su anbarı tam əsaslı şəkildə bərpa olunaraq istismara hazır vəziyyətə gətirilib.

Baş mühəndis əlavə edib ki, işğal dövründə istehkam kimi istifadə olunan sağ və sol sahil magistral kanallar da ciddi zədələnmişdi. Bərpa işləri nəticəsində sağ sahil magistral kanalının 5 200 metrlik hissəsi, sol sahil magistral kanalının isə 20,2 kilometr hissəsi yenidən qurulub. Bununla yanaşı, bütün hidrotexniki qurğular yenilənərək müasir standartlara uyğunlaşdırılıb.

Qeyd edək ki, həyata keçirilən bu layihələr regionun su təminatının yaxşılaşdırılmasına, kənd təsərrüfatının dayanıqlı inkişafına və ətraf mühitin bərpasına mühüm töhfə verir.