Sağ-salamat gözləyirdik yolunu, amma... | Daha 4 şəhid dəfn edildi

irinci Qarabağ müharibəsində itkin düşmüş hesab olunan və qalıqları aşkar edilən şəhidlər – Elman Camalov, Əbülfəz Əbilov, Cavanşir Hüseynov və Tahir Şirinovun nəşinin qalıqları Abşeron rayonuna gətirilib.

Hərbçilərin nəşi Mehdiabad qəsəbəsinin Şəhidlər xiyabanında dəfn olunub.

Qeyd edək ki, Elman Camalovun nəşinin qalıqları Daşaltı kəndindəki kütləvi məzarlıqda, Əbülfəz Əbilovun nəşinin qalıqları Füzulinin Yuxarı Seyidəhmədli kəndindəki kütləvi məzarlıqda, Cavanşir Hüseynov və Tahir Şirinovun nəşinin qalıqları isə Füzulinin Bala Bəhmənli kəndindəki kütləvi məzarlıqda aşkar olunub.

“Qardaşım 1991-ci ildə könüllü olaraq “Şıxov” batalyonuna yazılıb. Sonradan Daşaltı əməliyyatında iştirak etdiyini öyrəndik. Heç vaxt ümidimizi itirmədik, ölüsünün də, dirisinin də yolunu gözləyirdik”, – deyə şəhid Elman Camalovun qardaşı söyləyib.

Şəhid Əbülfəz Əbilovun oğlu atasının nəşinin tapıldığına görə həm sevindiklərini, həm də kədərləndiklərini deyib:

“31 ildir ki, yolunu gözləyirdik. Bu xəbərdən ona görə kədərləndik ki, sağ-salamat gəlməsini gözləyirdik. Sevinməyimizin səbəbi isə odur ki, ən azından ziyarət edə biləcəyimiz bir məzarı olacaq”.