Sakinin sosial yardımı niyə kəsildi? - DSMF-dən şikayət barədə açıqlama

Biləsuvar rayonu Nizami küçəsi, ev 128-də yaşayan Faiq Əsgərov ona təyin olunan sosial müavinətin kəsilməsindən şikayət edir.

Ailədə 4 nəfərin olduğunu deyən şikayətçi bildirir ki, 7 ay sosial yardım aldıqdan sonra ödəniş kəsilib.

Vətəndaş iddia edir ki, Dövlət Sosial Müdafiə Fondunun Salyan-Şirvan Regional İdarəsinin əməkdaşları onun mənzilini monitorinq edərkən qonağının avtomobilini onun nəqliyyat vasitəsi kimi rəsmiləşdirdiklərinə görə yardım kəsilib.

Məsələ ilə əlaqədar Əmək və Əhalinin Sosial Müdafiəsi Nazirliyinin tabeliyində olan Dövlət Sosial Müdafiə Fonduna müraciət etdik. Şifahi olaraq bildirildi ki, Biləsuvar rayon sakini Əskərov Faiq Fərhad oğlunun ünvanlı dövlət sosial yardımla bağlı elektron müraciətinə əsasən ailəyə 2024-cü ilin yanvarın 1-dən 433 manat 18 qəpik yardım təyin edilib.

Mütəmadi keçirilən monitorinqlərdən biri kimi vətəndaşın yaşadığı ünvanda maddi-məişət şəraitinin təkrar müayinəsi aparılıb.

Monitorinq zamanı vətəndaşın VAZ-2106 markalı nəqliyyat vasitəsindən istifadə etdiyi aşkarlanıb. Bu səbəbdən də ailəyə təyin olunmuş ünvanlı dövlət sosial yardımın ödənişi dayandırılıb.