Sarımsağın hansı faydaları var? | Diyetoloqdan mühüm məsləhətlər

Sarımsaqda çoxlu faydalı xüsusiyyətlər var. Bu məhsul bir sıra xəstəliklərə dərmandır. Səbəbi isə tərkibində orqanizmi viruslardan qoruyan faydalı yağların olmasıdır.

Bu barədə rusiyalı diyetoloq Yelena Solomatina xəbər verib.

Bununla belə, diyetoloq sarımsağın istehlak normasının hamı üçün fərqli olduğunu bildirib.

“Mən gündə bir diş çiy sarımsaq yeməyi tövsiyə edirəm. Amma bəzi insanlar bu məhsuldan tamamilə imtina etməlidirlər. Məsələn, mədə-bağırsaq traktı ilə problemi olanlar. Efir yağları bağırsağın selikli qişasına qıcıqlandırıcı təsir göstərir və kəskinləşməyə səbəb ola bilər”, – deyə Y.Solomatina xəbərdarlıq edib.

Mütəxəssisin sözlərinə görə, sarımsaq qanı yaxşı durulaşdırır, ona görə də aterosklerozdan əziyyət çəkən insanlar üçün faydalıdır.

“Lakin əgər qanı durulaşdırmaq deyil, əksinə, laxtalandırmaq istəyirsinizsə, sarımsağı qida rasionundan tamamilə çıxarmaq lazımdır”, – deyə diyetoloq dəqiqləşdirib.

O, sarımsaqda “C”, “B6”, “B1”, “B2”, “B3”, “B5”, “B9” kimi vitaminlər, həmçinin kalsium, kalium, fosfor, selen, maqnezium, natrium, sink, dəmir və manqan kimi faydalı mikroelementlər olduğunu vurğulayıb.

“Lakin başa düşmək vacibdir ki, soyuqdəyməni yalnız onunla müalicə etmək olmaz. O, viruslarla mübarizədə düzgün müalicə ilə birlikdə əla köməkçi ola bilər”, – deyə Y.Solomatina sözlərini yekunlaşdırıb.