Son 9 ayda 158 cinayətkar qrup zərərsizləşdirilib

Daxili İşlər Nazirliyində ölkəmizin noyabrda ev sahibliyi edəcəyi BMT-nin İqlim Dəyişikliyi Konfransı – COP29-la bağlı Kollegiya İclası keçirilib.

İclasda daxili işlər naziri, general-polkovnik Vilayət Eyvazov müzakirəyə çıxarılan məsələlərin insanların həyat, sağlamlıq, hüquq və azadlıqlarının müdafiəsi kimi mühüm sahələri əhatə etdiyini, habelə COP29 tədbiri ilə əlaqədar qarşıya qoyulan vəzifələrin xüsusi plan əsasında ardıcıllıqla yerinə yetirildiyini və beynəlxalq əhəmiyyətli həmin tədbirə hazırlıq işlərinin davam etdiyini bildirib.

2024-cü ilin 9 ayının yekunları ilə bağlı diqqətə çatdırılıb ki, bu müddət ərzində DİN və prokurorluq üzrə qeydə alınan 24 586 cinayətin 89,8 faizi açılıb. Ötən ilin müvafiq dövrü ilə müqayisədə ağır və xüsusilə ağır cinayətlər, qəsdən adam öldürmə və buna cəhdlər, qəsdən sağlamlığa ağır zərər vurma, oğurluq, soyğunçuluq, informasiya texnologiyalarından istifadə etməklə və qrup halında törədilən, yetkinlik yaşına çatmayanların və əvvəllər məhkum olunanların hüquqazidd əməlləri, ailə münaqişəsi zəminində baş verən hadisələrin sayı bütövlükdə 2192 fakt azalıb. Axtarışa elan edilən 6703 nəfərdən 84 faizi tutulub, habelə ağır və xüsusilə ağır cinayətlər törətməkdə şübhəli bilinən 390 nəfərdən ibarət 158 cinayətkar qrup zərərsizləşdirilib.

Gündəlikdəki məsələlər üzrə Nazirliyin aidiyyəti baş idarələrinin rəisləri məruzə edərək, narkotiklərlə mübarizə, gənclərin Polis Akademiyasında təhsilə təşviqi, kadrların hazırlığı və peşəkarlıqlarının yüksəldilməsi, COP29 tədbiri ilə əlaqədar hazırlıq işlərinin gedişi və digər istiqamətlərdə görülmüş işlərdən, qarşıya qoyulmuş tapşırıqların icra vəziyyətindən, əldə edilən nəticələrdən danışıblar.

İclasa yekun vuran nazir Vilayət Eyvazov cari ilin 9 ayında ictimai asayiş və təhlükəsizliyin təmini ilə bağlı qanunla müəyyən edilmiş vəzifələrin layiqincə yerinə yetirildiyini, cinayətkarlıqla mübarizədə, insan hüquq və azadlıqlarının qorunmasında əldə olunmuş müsbət nəticələrin hesabat dövründə qorunub-saxlanıldığını və bir sıra istiqamətlərdə inkişaf etdirildiyini vurğulayıb.