Taksilərin sayını azaltmaqla tıxacların qarşısını almaq mümkündür? - AKTUAL GÜNDƏM

Bakı şəhərində nəqliyyat tıxaclarının getdikcə dərinləşməsi fonunda Nazirlər Kabineti taksi fəaliyyətinə dair yeni məhdudiyyətlər tətbiq etmək barədə qərar qəbul edib. Baş nazir Əli Əsədovun imzaladığı qərar taksi minik avtomobilləri üçün verilən icazələrin əlavələrinin sayını məhdudlaşdırmağı nəzərdə tutur. Baku TV-nin "Aktual Gündəm" proqramında bu qərarın əsas hədəflərindən biri olan tıxacların azaldılması məsələsi ekspertlər tərəfindən ətraflı təhlil edilib. Müzakirələr taksilərin sayının avtomatik olaraq tıxacları aradan qaldırıb-qaldırmayacağı, yoxsa bunun yalnız taksi xidmətlərinin keyfiyyətinin artırılmasına xidmət edəcəyi üzərində cəmləşib. Ekspertlər tıxac probleminin həllinin təkcə taksilərin sayının azaldılması ilə deyil, həm də ictimai nəqliyyatın inkişafı, yol-nəqliyyat infrastrukturunun optimallaşdırılması və xüsusi hərəkət zolaqlarının tətbiqi kimi kompleks tədbirlərlə mümkün olduğunu vurğulayıblar. Qərar eyni zamanda taksi sektorunda keyfiyyətsiz xidmətin qarşısını almaq və rəqabəti sağlamlaşdırmaq məqsədi daşıyır.