Tbilisidə kitab təqdimatı | Azərbaycanlı müəllimlərə həsr edilmiş kitab işıq üzü gördü - Baku TV

Tbilisidəki Mirzə Fətəli Axundzadə adına Azərbaycan Mədəniyyəti Muzeyində Baku TV-nin Gürcüstan bürosunun əməkdaşı, Əməkdar jurnalist Nadir Almazoğlunun müəllifi olduğu “İşıqlı gələcək bəxş edən müəllimlərimiz” adlı kitabın ikinci hissəsinin təqdimat tədbiri keçirilib.

Tədbirdə ictimaiyyət nümayəndələri, müxtəlif ali təhsil ocaqlarının professorları, məktəb direktorları, müəllimlər, ziyalılar və gənclər iştirak ediblər. Tədbirə müəllifin ömür yoluna həsr edilmiş sənədli filmin göstərilməsi ilə başlanılıb. Daha sonra çıxış edənlər Əməkdar jurnalist Nadir Almazoğlunun fəaliyyətindən danışaraq Gürcüstanda azərbaycandilli məktəblərin müəllimlərinə göstərdiyi diqqətin önəmini vurğulayıblar. Tədbir iştirakçıları kitabda onlarla müəllimin bioqrafik məlumatlarının yer almasını yüksək qiymətləndirərək bunun Gürcüstanda bir ilk olduğunu qeyd ediblər.

Gürcü ictimaiyyətinin nümayəndələri də Azərbaycan və Gürcüstan xalqları arasında əzəli dostluq münasibətlərinin olmasından danışıblar. İştirakçılar kitabın gürcü dilinə tərcümə edilməsinin önəmini vurğulayıblar.

Sonda müəllif Nadir Almazoğlu 60 illik yubileyi münasibətilə Azərbaycan və Gürcüstan arasında mədəni əlaqələrin inkişafına verdiyi töhfələrə görə Mirzə Fətəli Axundzadə adına Azərbaycan Mədəniyyəti Muzeyinin rəhbərliyi tərəfindən xüsusi mükafatla təltif edilib.