Ulu Öndərin "Ermənilərə göndərin" dediyi film | Hər şey yaxşılığa doğru

“Hər şey yaxşılığa doğru” filmi yer üzündə baş verən bütün müharibələrə qara yumorla etiraz edir. Filmdə müharibənin törətdiyi acı reallıq öz əksini tapıb.

Bir zamanlar Bakıda yaşayan erməni Qarabağ müharibəsində həlak olur və cəsədini səhvən Bakıya göndərirlər. Bundan sonra Bakıda yaşayanlar tabutla nə edəcəyini bilmirlər və tragikomik vəziyyət yaranır.

“Hər şey yaxşılığa doğru” filmi Almaniyanın Oberhauzen şəhərində keçirilən festivalda dörd mükafat alıb və mükafatların hər birinin adında humanizm sözü var.

Birinci Qarabağ müharibəsində məğlub olmağımıza baxmayaraq, filmdə Azərbaycan humanizmi qabarıq şəkildə özünü göstərir. Papanın erməni meyiti yerinə qaynaqçıya şillə vurması, meyit üçün xüsusi keşiş gətirilməsi buna sübutdur.

Bu filmə nəinki azərbaycanlılar, ermənilər də böyük maraq göstəriblər.

“Xəbər gəldi ki, bu filmi ermənilər istəyirlər. Nə etməli olduğumu bilmədim. Ulu öndər Heydər Əliyevlə əlaqə saxladım. Məsələni danışan kimi dərhal dedi ki, göndər. Söylədi ki, filmi təkcə özümüz üçün çəkməmişik ki. Qoy onlar da görsün, necə humanist xalqıq”, – filmin rejissoru Xalq artisti Vaqif Mustafayev bildirib.