Valideynlərin diqqətindən kənar qalan vərdişlər | Övladlarınızı bunlardan uzaq tutun…

Valideynlərin bir çoxu qız övladlarının kiçik yaşlarından etibarən gözəl görünməsini istədikləri üçün onlara dırnaq boyası çəkməyi adi hal kimi qəbul edir. Ancaq bu "məsum" gözəllik oyununun arxasında hansı təhlükələrin gizləndiyini çox az adam düşünür.

Mütəxəssislərin fikrincə, dırnaq boyalarının tərkibində xüsusən də uşaq orqanizmi üçün nəzərdə tutulmayan zərərli kimyəvi maddələr var. Onlar allergik reaksiyalar, tənəffüs problemləri, hətta hormonal sistemdə pozuntular yarada bilər.

Pediatrların sözlərinə görə, uşaqların dırnağına lak çəkmək onların dərisi ilə və selikli qişası ilə təmasda olan maddələrin daha tez sorulmasına səbəb olur. Onlar əllərini tez-tez ağızlarına apardıqları üçün bu maddələr bədənə birbaşa daxil ola bilir.

Estetik baxımdan valideynləri sevindirən bu vərdiş psixoloji baxımdan da risklidir. Erkən yaşlarda makiyaj və gözəllik anlayışına alışan uşaqlar öz görünüşlərinə həddindən artıq önəm verməyə, özlərini yalnız xarici görünüşlə ifadə etməyə başlaya bilərlər. Bu isə onların özünəinamına, şəxsiyyətlərinin inkişafına və gələcəkdə formalaşacaq dəyərlərinə mənfi təsir edə bilər.