Vətəndaşlara vəd verib adlarına şirkət açırlar

Günümüzdə özünə aid olmasa da, adına şirkətlər yaradılmış çox insanla qarşılaşmaq olur. Onlar bu müəssisələrdən gəlir əldə etməsələr də, günlərin birində xeyli vergi borcunun olduğunu öyrənirlər.

Məsələ ilə bağlı iqtisadçı Rəşad Həsənov bildirib ki, bəzi hallarda vətəndaşların məlumatsızlığından istifadə edərək onların adına sahibkarlıq subyekti olaraq qeydiyyat həyata keçirirlər: “Yəni vətəndaşların hansısa formada (elektron imza, “ASAN İmza”) məlumatlarını əldə etdilərsə, kənardan sahibkarlıq subyekti yarada bilirlər. İkinci halda isə müəyyən kiçik vədlər verirlər. Çox vaxt işləməyən insanlara 50-100 manat şirnikləşdirici təkliflər edərək onların adına müəssisələr yaradırlar, bank hesabları açırlar”.

Dövlət Vergi Xidməti də problemdən xəbərdardır. Vətəndaşları sahibkarlıq niyyəti olmadan heç bir müəssisə yaratmamağa çağırır. Əks halda yaranacaq vergi borclarına görə məsuliyyəti həmin şəxslər daşıyacaq. Odur ki, vətəndaşlara diqqətli olmaq, kimlərinsə sözlərinə aldanıb, sahibkarı olmayacağı təqdirdə müəssisə və şirkəti öz adlarına qeydiyyatdan keçirməmək tövsiyə edilir.