Vikinqlərlə bağlı səs-küy yaradan tapıntılar | Əslində, bu tayfalar...

Louisville, Vayominq və Farer Adaları Universitetlərinin alimləri Farer adalarının genetik irsini tədqiq edərək, müxtəlif vikinqlərin bu adalarda, eləcə də İslandiyada məskunlaşdığını aşkar ediblər.

18 adadan ibarət arxipelaq olan Farer adaları vikinqlərin məskunlaşdığı yerlərdən biri olub.

Genetik məlumatların təhlili göstərib ki, Farer adalarında Y-xromosom haploqruplarının paylanması Norveç və Danimarkadakı müasir paylanma ilə çox oxşardır, lakin İslandiyadakılar fərqlidir. Bu ərazilərdə məskunlaşanlar iki vikinq qrupuna aid olub. Məlumatlar Norveç, İsveç, Danimarka, İslandiya və İrlandiyadan olan 412 kişinin oxşar genotipləri ilə müqayisə edilib və Vikinq populyasiyasının genetik mənzərəsi yenidən qurulub.

Geniş təhlillər göstərib ki, Farer adalarının genetik müxtəlifliyi daha geniş Skandinaviya genotiplərinə bənzəyir, İslandiya nümunələri isə əhəmiyyətli dərəcədə fərqlidir. Coğrafi yaxınlıqlarına baxmayaraq, bu populyasiyalar arasında əhəmiyyətli qarışıqlıq olmayıb. Bu kəşf Vikinqlərin tarixinə yeni prizmadan baxmağa imkan verir.

Xatırladaq ki, vikinqlərlə bağlı son səs-küy yaradan tapıntı məşhur norveçli səyyah, alim Tur Heyerdala məxsusdur. O, bəzi vikinq tayfalarının Qobustanda yaşadığına dair faktlarla gündəmə düşmüşdü.