Xaçmaz rayonunda polis işçilərinin peşə bayramı qeyd edildi

Xaçmazda 2 iyul – Polis Günü qeyd olunub.

Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzüb, xatirəsini ehtiramla yad ediblər.

İcra Hakimiyyətinin başçısı Elnur Rzayev polis əməkdaşlarını təbrik edib, onlara gələcək fəaliyyətlərində uğurlar arzulayıb.

Bildirilib ki, Azərbaycanda daxili işlər orqanlarının inkişafı ümummilli lider Heydər Əliyevin adı ilə bağlıdır. Bu siyasəti ölkə prezidenti İlham Əliyev uğurla davam etdirir. Son illər polis orqanlarının maddi-texniki bazası gücləndirilib, əməkdaşların peşəkarlıq səviyyəsi artırılıb, onların sosial durumlarının yaxşılaşdırılması istiqamətində mühüm tədbirlər həyata keçirilib.

Rayon Polis Şöbəsinin rəisi, polis-polkovniki Həmid Həsənov qeyd edib ki, Azərbaycan polisi yarandığı gündən ictimai asayişin və təhlükəsizliyin mühafizəsi, sabitliyin, əmin-amanlığın qorunması, cinayətkarlığa qarşı mübarizə kimi məsuliyyətli vəzifələrin öhdəsindən layiqincə gəlib.

Digər çıxış edənlər 106 illik tarixə malik Azərbaycan polisinin keşməkeşli, şərəfli bir yol keçdiyini bildiriblər. Dövlətimizin formalaşmasında, milli maraqlarımızın qorunmasında Azərbaycan polisinin müstəsna xidmətləri haqqında danışıblar.

Sonda xidmətdə fərqlənən bir qrup polis əməkdaşına Rayon İcra Hakimiyyətinin fəxri fərmanı təqdim edilib, veteran polis əməkdaşlarına hədiyyələr verilib.