Xırdalanda Finikiya izi | DNT nəticələri hansı gerçəkləri üzə çıxardı? - Baku TV

Heç düşünmüsünüzmü, sizdə olan hansısa xüsusiyyət, bacarıq, hətta xarakter kimdən keçib?

Bəzən ailədə illərdir danışılan hekayələrin arxasında tamam fərqli həqiqət dayanır. İnsan öz keçmişini araşdırarkən gözləmədiyi nəticələrlə qarşılaşa bilər. Məsələn, əsrlərdir Xırdalanda yaşayan bir nəslin ata xəttinin min illər əvvələ, qədim Levant bölgəsinə – indiki Livan ərazisinə qədər uzandığı müəyyənləşdirilib.

Tədqiqatçılar müasir insanların DNT nəticələrini qədim DNT nümunələri ilə müqayisə edərək onların hansı nöqtələrdə kəsişdiyini araşdıra bilirlər. Beləliklə, bu gün yaşayan bir insanın ata xəttinin izini minlərlə il əvvələ qədər izləmək mümkün olur.

Genetik tədqiqatçı Orxan Xansuvar bildirib ki, ağız suyundan nümunə götürülür, paketləşdirilir və analiz üçün rəsmi qaydada ABŞ-yə göndərilir:

“Dörd-beş aya cavablar onlayn formada çıxır. Elə bir seyid nəsli var idi ki, onların ocaqları, pirləri, xüsusi strukturları var idi və bu, əzəldən gələn bir ənənə idi. Həmin nəsilləri test etmişdik və görmüşdük ki, ümumiyyətlə, ata xətti ilə nəinki seyidlərə, hətta ərəblərə də aidiyyəti yoxdur.

Xırdalanda, məsələn, Abbasalılar nəsli var. Dövlət arxiv fondlarında saxlanılan sənədlərə əsasən, bu nəsil kəndin əsasını qoyub. Maraqlıdır ki, həmin Abbasalılar nəslinin “J1STS7680” subkladı olduğu müəyyənləşib. Bu subkladın təxminən 3200 il yaşı var.

Maraqlıdır ki, 3200 il ərzində həmin xırdalanlı həmyerlimizin ata xətti heç bir azərbaycanlı ilə birləşmədiyi halda birbaşa Livandakı qədim nümunə ilə – Finikiya qəbrindən götürülmüş nümunə ilə uyğunluq göstərir.

Laçında bir nəsildə “TSTS6280” subkladı aşkarlanıb. Bu subklad İsrail, Fələstin və Livan ərazilərindəki mağaralarda aşkar edilən qədim insan qalıqlarının sümük analizləri zamanı müəyyən edilib. Bu isə Azərbaycanda finikiyalılarla bağlı güclü genetik əlaqələrin mövcudluğuna dair maraqlı faktlardan biridir”.