XTQ giziri şəhid Ramil Musayevin xatirəsinə kitab həsr edildi

44 günlük Vətən müharibəsi şəhidi, Xüsusi Təyinatlıların giziri Ramil Musayevin xatirəsinə həsr edilmiş “Qəhrəmanın şəhadəti” adlı kitabın təqdimat mərasimi keçirilib.

Qəhərəman döyüşçünün təhsil aldığı 6 saylı tam orta məktəbdə keçirilən təqdimat mərasimində Rayon İcra Hakimiyyətinin başçısı Nahid Bağırov, YAP İsmayıllı rayon təşkilatının sədri, şəhid ailələri, qazilər, ictimaiyyət nümayəndələri, şəhidin ailə üzvləri iştirak edib. İlk olaraq şəhidin məzarı ziyarət edilib, məzarı üzərinə gül dəstələri düzülüb.

Tədbiri giriş sözü ilə RİH başçısı Nahid Bağırov açaraq Vətənin müdafiəsi uğrunda canından keçən Ramil Musayevin və digər şəhidlərimizin xalqımız tərəfindən daim dərin ehtiramla yad edildiyini, onların qanlarının yerdə qalmadığını bildirərək bütün şəhidlərimizə rəhmət və qazilərimizə şəfa diləyib, kitabın ərsəyə gəlməsində əziyyəti olan şəxslərə öz minnətdarlığını bildirib.