Yeni yaradılan ictimai çimərliklərdə nələr olacaq? | Detallı açıqlama - Baku TV

Dövlət Turizm Agentliyinin layihəsi çərçivəsində cari ildə ölkə ərazisində ümumi sahəsi 30 hektar olan 10 yeni ictimai çimərlik yaradılıb. Hər birinin sahəsi 3 hektar təşkil edən çimərliklərin 4-ü Novxanı və Coratda, 3-ü Şüvəlanda, 2-si Türkanda, 1-i isə Şıx ərazisində yerləşir.

Yeni yaradılan ictimai çimərliklərdəki şərait və təhlükəsizlik tədbirləri barədə Dövlət Turizm Agentliyinin Media və ictimaiyyətlə əlaqələr sektorunun böyük məsləhətçisi Rufik İsmayılov məlumat verib.

O bildirib ki, əsas məqsəd vətəndaşların təhlükəsizliyini və rahatlığını təmin etməkdir:

"Avtomobillərin sahil zolağına daxil olmasının qarşısını almaq üçün kənarda pulsuz avtodayanacaqlar təşkil olunub. Çimərliklərə giriş, avtodayanacaqlar, daimi su ilə təmin edilmiş sanitar qovşaqlar, soyunub-geyinmə otaqları, eləcə də uşaq əyləncə meydançaları, futbol və voleybol sahələrindən istifadə tamamilə ödənişsizdir".

R.İsmayılov vurğulayıb ki, çətirlərin altında istirahət etmək və günəşlənmək üçün vətəndaşlardan heç bir ödəniş tələb olunmur. Ərazidə ödənişli xidmət isə könüllü xarakter daşıyan stol-stul icarəsidir.