ABŞ və İran arasındakı çaxnaşma bitir, yoxsa...? | Tehranın 2 seçimi var

“İran İslam Respublikası vasitəçilərlə ABŞ Prezidentinin məktubuna cavab verib və mümkün danışıqların qapısını açıb”.

Bunu Donald Trampın xüsusi nümayəndəsi Stiven Uitkoff jurnalist Taker Karlsona müsahibəsi zamanı deyib.

S.Uitkoff bildirib ki, Tramp Xameneiyə məktubunda təkcə nüvə məsələsini deyil, iki ölkə arasındakı bütün problemləri həll etmək istədiyini qeyd edib.

“Bildiyiniz kimi, Prezident Tramp İran rəhbərliyinə məktub göndərərək nüvə problemini və daha geniş gərginliyi həll etmək üçün birbaşa danışıqları təklif edib. İran bu məktuba cavab verib. Dialoq üçün mümkün qapılar açıldı. Bu, düzgün istiqamətdə atılan addımdır. Məqsədimiz bəllidir: İranla bütün məsələləri hərbi əməliyyatlara əl atmadan sülh yolu ilə həll etmək”, – deyə S.Uitkoff bildirib.

O əlavə edib ki, D.Tramp bu məsələnin gərginlik artmadan, Ramazan və Pasxadan sonra aprel ayına qədər ABŞ-nin təklif etdiyi körpü planına uyğun olaraq həll olunmasını istəyir.

“İnanıram ki, Səudiyyə Ərəbistanı və ya Rusiya kimi müttəfiqlərimizin dəstəyi ilə tezliklə bu danışıqlara başlaya bilərik. Əgər İran razılaşarsa, ABŞ sanksiyaları tədricən ləğv edə və İranın qlobal iqtisadiyyata qayıtmasına icazə verə bilər. Bu da öz növbəsində daha güclü ticarət əlaqələri, beynəlxalq bazarlara çıxış və investisiya imkanları deməkdir”, – deyə S.Uitkoff vurğulayıb.