İranın növbəti hədəfi bu ölkələr olacaq? - Baku TV

“Bölgədə ABŞ və İsrailə məxsus bütün obyektlər İran üçün qanuni hədəfdir”.

Bunu adı açıqlanmayan İran rəsmisi “Al Jazeera” telekanalına deyib.

“ABŞ ilə İsrailin Yaxın Şərqdəki bütün maraqları və mövcudluğu bizim üçün qanuni hədəf olacaq. Bu təcavüzdən sonra bizim heç bir “qırmızı xətt”imiz yoxdur və hər şey mümkündür. Hətta daha əvvəl nəzərdən keçirilməyən ssenarilər də baş verə bilər”, – deyə İran rəsmisi qeyd edib.

Onun sözlərinə görə, İran ABŞ və İsrailin hücumundan təəccüblənməyib. İran rəsmisi vurğulayıb ki, heç bir zaman məhdudiyyət olmayacaq və kompleks cavab veriləcək. İranın təslim olması və ya özünü cilovlaması ilə bağlı bütün çağırışlar qəbuledilməzdir, bu, sadəcə, xəyaldır. Bu arada Bəhreyndə həyəcan siqnalı işə düşüb.

Bu barədə Bəhreyn Krallığının Daxili İşlər Nazirliyinin sosial şəbəkələrdəki məlumatında bildirilib.

Nazirlikdə həyəcan siqnalının işə düşmə səbəbləri hələlik dəqiqləşdirilməyib. Ölkə vətəndaşlarına və sakinlərinə sakit qalmaları və ən yaxın təhlükəsiz yerə getmələri tövsiyə olunub.

“Al Jazeera” telekanalının məlumatına görə, Bəhreyndə partlayışların baş verməsi barədə də məlumatlar daxil olur.

Bundan başqa, Bəhreyn Daxili İşlər Nazirliyinin fövqəladə vəziyyət elan etdiyi bildirilir. Ölkə hava məkanını bağlayıb. Bundan başqa, Qətərin də hava məkanını bağladığı bildirilir.