İsrail mediası: HƏMAS beynəlxalq ictimaiyyətə təsir etmək istəyir

Baku TV-nin İsraildəki xüsusi müxbiri Leyli Məhərrəm bu ölkədəki vəziyyətlə bağlı son məlumatları təqdim edib.

Jurnalist bildirib ki, Baş nazir Benyamin Netanyahu və müdafiə naziri Yoav Qallant yaydıqları birgə bəyanatda HƏMAS-a qarşı mübarizəni gücləndirmək məqsədilə ölkədə fövqəladə vəziyyət elan ediblər:

“BMT-nin Humanitar Məsələlər üzrə Koordinasiya Ofisi açıqlamasında bildirib ki, TSAXAL-ın Qəzza zolağına hücumları nəticəsində 2540 ev tamamilə yararsız hala düşüb, 23 min yaşayış obyekti isə ciddi ziyan görüb. ABŞ İsrail sahillərinə ikinci aviadaşıyıcı gəmi göndərib. Gəminin göyərtəsində 90 təyyarə və helikopter var”.

Qeyd olunub ki, oktyabrın 11-i axşam saatlarında HƏMAS-ın bir israilli qadını və iki uşağını azad etdiyi barədə məlumat yayılıb. Xarici mətbuatda bildirilib ki, qadın 4 yaşlı və 5 aylıq körpəsi ilə birlikdə azad edilib. Sözügedən materialda jurnalist videonun nə vaxt çəkildiyini bilmədiyini və girovların azad edilməsi faktının nə dərəcədə etibarlı olduğunu təsdiq edə bilməyəcəyini vurğulayıb. İsrail mediasında isə bu videodan söz düşəndə bildirilib ki, HƏMAS bununla beynəlxalq ictimai rəyə təsir etmək istəyir.