Kerolayn Livitt ABŞ-yə qanunsuz daxil olanlara səsləndi | Sərxoş dənizçilər kimi...

Ağ Evin yeni sözçüsü Kerolayn Livitt yeni vəzifədə ilk brifinqini keçirib.

K.Livitt mətbuat konfransında ABŞ Prezidenti Donald Trampın immiqrasiya siyasəti haqqında açıqlamalarına da xüsusi yer ayırıb.

O, qeyri-qanuni immiqrasiya ilə bağlı sərt mesajlar verərək ABŞ-yə qanunsuz daxil olan hər kəsin cinayətkar sayılacağını bildirib:

“Əcnəbi ABŞ-yə qeyri-qanuni yollarla daxil olursa, əlbəttə ki, cinayətkar sayılır. Əgər onlar ölkəmizin qanunlarını pozublarsa, bəli, cinayətkardırlar. Bu şəxslər mütləq cəzalandırılmalı və ölkəmizin qanunlarına hörmətlə yanaşmağı öyrənməlidirlər”.

Mətbuat katibi həmçinin müxtəlif qrantlar və kreditlər də daxil olmaqla hökumətin maliyyə yardımı proqramlarının dayandırılmasından da bəhs edib:

“Prezident Trampın administrasiyası Co Baydenin komandasının bu cür layihələrə böyük xərcləmələri səbəbindən bəzi federal proqramların maliyyələşdirilməsini dayandırıb. Son dörd il ərzində Bayden administrasiyası sərxoş dənizçilər kimi pul xərcləyib və bu, ölkədə inflyasiya böhranının səbəblərindən birinə çevrilib”.