Parisdə 900 min nümayişçiyə qarşı 80 min polis səfərbər olub

Fransada büdcə ixtisarlarına qarşı ümummilli etiraz aksiyaları keçirilib.

Parisdə polis küçələri bağlayıb, mağazaların vitrinləri taxta lövhələrlə qorunub.

Nümayişçilər arasında müəllim, maşinist, əczaçı və xəstəxana işçiləri də olub. Məktəblərdə isə şagirdlər dərs prosesini dayandırıblar.

Məqsəd Baş nazir Sebastian Lekornunu maaş və təqaüdlər, eləcə də ictimai xidmətlərlə bağlı qəbul edilmiş qərarları yenidən nəzərdən keçirməyə məcbur etməkdir.

Unikal etirazların mərkəzində əvvəlki hökumətin fiskal planlarının ləğvi, ictimai xidmətlərə daha çox vəsait ayrılması və varlılara yüksək vergi tətbiqi dayanır. Paytaxtda metro xətlərinin əksəriyyəti gün ərzində işləməyib.

Etirazlara həmkarlar ittifaqları ilə yanaşı, sol müxalifət də dəstək verir.

“Əyilməz Fransa” Partiyasının lideri Jan-Lük Melanşon da hökuməti kəskin tənqid edib:

“Hökumət sosial tələbləri nəzərə almaq gücündə deyil. Əgər etimad səsverməsi keçirilməsə, biz etimadsızlıq təklifi verəcəyik”.

Daxili İşlər Nazirliyi aksiyalarda 900 minədək insanın iştirak edə biləcəyini açıqlayıb. Prezident Emmanuel Makron və Baş nazir Sebastian Lekornu isə həm parlamentin, həm də investorların təzyiqi altındadır.

Bugünkü etirazların 2023-cü ildən bəri ən böyük nümayiş olacağı bildirilir. Fransa Daxili İşlər Nazirliyi 80 min polis və jandarm qüvvələrinin dronlar, zirehli texnika və su şırnaqları ilə silahlandırılaraq səfərbər ediləcəyini bildirib.