Qərbin Suriyaya müdaxilə dövrü başa çatdı? | İsrail qəzetindən sensasiyalı yazı

Suriya Prezidenti Əhməd əl-Şaraanın yüksəlişi və İranın bölgədəki təsirinin zəifləməsi İsrail və Türkiyənin Qəzza zolağındakı müharibə səbəbindən gərgin münasibətlərinə baxmayaraq, öz hərəkətlərini əlaqələndirməyə başlaya biləcəkləri yeni şərait yaradır.

Bu barədə İsrailin “Maariv” qəzeti yazır.

Nəşrin bildirdiyinə görə, Suriyada vətəndaş müharibəsi başlayandan İsrail müdaxilə etməmək siyasətinə sadiq qalıb. Lakin Suriyanın yeni rəhbərliyinin hakimiyyətə gəlməsi və Ankaranın nüfuzunun artması əvvəlki strategiyanı əhəmiyyətsiz edir.

Suriya və qonşu ölkələrdə kürd təsirini məhdudlaşdırmağa çalışan Türkiyə Dəməşqlə sıx əlaqələr qurur. Bu siyasət Fars körfəzi ölkələri tərəfindən də dəstəklənir.

Təl-Əvivlə Ankara arasında siyasi soyuqluğa baxmayaraq, “Maariv” analitikləri hesab edirlər ki, Suriya istiqaməti yaxınlaşma nöqtəsinə çevrilə bilər.

Nəşr vurğulayır ki, İran mövqelərini itirir və bu, Türkiyənin təsirinin İsrail sərhədlərində İranın təsirindən daha üstün olduğu yeni təhlükəsizlik arxitekturası yaratmaq imkanı verir.

ABŞ-nin Suriya üzrə xüsusi nümayəndəsi və Ankaradakı səfiri Tom Barak deyib ki, Qərbin Suriyaya müdaxiləsi dövrü başa çatıb:

“Biz Türkiyə, Körfəz ölkələri və Avropanın yanındayıq. Bu dəfə hərbçilərlə, çıxışlarla və ya xəyali sərhədlərlə deyil, Suriya xalqının özləri ilə çiyin-çiyinə. Bəşər Əsəd rejiminin devrilməsi ilə biz sanksiyaları qaldıraraq Suriya xalqına özlərinə firavanlıq və təhlükəsizlik yolu açmağa imkan verərək sülhün qapısını açdıq”.

O qeyd edib ki, “Qərb müdaxiləsi erası” arxada qalıb və gələcək regional həll yollarına, eləcə də tərəfdaşlıq və hörmətə əsaslanan diplomatiyaya aiddir.