Rusiya da qisasını PUA-larla aldı | Ukraynanın bu şəhəri alova büründü

04 iyun 2025 370 baxış

İyunun 3-dən 4-nə keçən gecə Rusiya Silahlı Qüvvələri Xarkovu atəşə tutub.

Pilotsuz uçuş aparatları ilə endirilən zərbələr nəticəsində şəhərin 4 istiqamətində genişmiqyaslı yanğınlar başlayıb. Yaşayış evlərinə ciddi ziyan dəyib, yaralanan insanların sayı dəqiqləşdirilir.

Bu barədə şəhər meri İqor Terexov şəxsi “Telegram” kanalında məlumat verib.

Bildirilib ki, ilk hesablamalara görə, Rusiya tərəfi 9 “Şahed” dronu və 2 raketdən istifadə edib.

Ölkə mətbuatında əlavə edilib ki, vilayətin Novobavarsk rayonunda 600 kvadratmetr ərazisi olan anbar, texniki xidmət stansiyası və yaşayış binası yanıb.

Rusiya Müdafiə Nazirliyindən isə bildirilib ki, gecə ərzində Krım, Kursk, Belqorod səmasında Ukrayna Silahlı Qüvvələrinə məxsus ümumilikdə 7 PUA zərərsizləşdirilib.

Ukrayna Silahlı Qüvvələrinin Baş Qərargahından əlavə edilib ki, Rusiya son sutka ərzində 1000-dən çox hərbçisini və 223 texnikasını itirib.

#Xarkov vilayəti