Rusiya ərazilərində gərgin vəziyyət | Əhaliyə təcili çağırış edildi

Ukrayna Rusiya ərazisinə hücumlarını davam etdirir.

Rusiya Hava Hücumundan Müdafiə Qüvvələri avqustun 13-də Ukraynaya məxsus 14 ədəd pilotsuz uçuş aparatını zərərsizləşdirib.

Bu barədə ölkənin Müdafiə Nazirliyi məlumat yayıb. Bildirilib ki, hava əməliyyatları Kursk, Belqorod və Voronej səmasında həyata keçirilib.

Bundan əlavə, səhər saatlarında Kiyevin federasiya ərazisindəki hədəflərə qarşı təyyarə tipli PUA-lardan istifadə etməklə terror aktı törətmək cəhdinin qarşısı da alınıb.

Belqorod vilayətinin qubernatoru Vyaçeslav Qladkov da “Telegram” kanalında paylaşım edərək məlumatı təsdiqləyib. Bildirib ki, Ukrayna Silahlı Qüvvələrinə məxsus pilotsuz uçan aparatın hücumu nəticəsində bir neçə avtomobil vurulub. Mülki şəxslər yaralanıb. Gecə ərzində bir neçə dəfə həyəcan təbili çalınıb, raket təhlükəsinin olduğu vurğulanıb.

Bu arada, Kursk vilayətində raket təhlükəsi də elan edilib. Vilayətin qubernatoru vəzifəsini icra edən Aleksey Smirnov özünün “Telegram” kanalında məlumat verərək əhaliyə sığınacaqlara getmələri barədə çağırış edib.