Rusiyanın xəbərdarlığından sonra Vaşinqton hansı addımı atacaq? - Baku TV

Xarkovda Rusiya Ordusunun aviazərbələri nəticəsində 3 nəfər ölüb, 25 nəfər yaralanıb.

Bu barədə Xarkov meri İqor Terexov məlumat verib.

Onun sözlərinə görə, Rusiya Ordusu Xarkovun Sloboda rayonuna aviazərbələr endirib. Nəticədə anbar sahəsində yanğın baş verib, bir neçə yaşayış binasına ciddi ziyan dəyib.

İqor Terexov əlavə edib ki, binalardan birinin dağıntıları altında insanların qala biləcəyi ehtimalı var. Hazırda ərazidə xilasetmə və axtarış işləri aparılır.

Bu arada, ABŞ dövlət katibi Marko Rubio Kiyevdəki ABŞ səfirliyinin fəaliyyətinin dayandırıla biləcəyini istisna etməyib. Onun sözlərinə görə, hər hansı diplomatik nümayəndəlik üçün təhlükə yarandığı və buna cavab olaraq onun statusunun dəyişdirilməsinin zəruri olduğu qənaətinə gəlinərsə, ABŞ müvafiq addımlar atacaq.

Marko Rubionun açıqlaması Rusiyanın xarici diplomatlara Kiyevdə qalmağın təhlükəli olması barədə xəbərdarlığından sonra səslənib.

Qeyd edək ki, Rusiya Xarici İşlər Nazirliyi xarici vətəndaşlara və diplomatik nümayəndəliklərin əməkdaşlarına Kiyevdən çıxmaq barədə çağırış edib.