Sebastian Lekornu Makronun nüfuzunu bərpa etməyə çalışacaq

Fransa siyasi səhnəsində növbəti dəyişiklik baş verib. Prezident Emmanuel Makron rəsmi olaraq Sebastian Lekornunu yeni Baş nazir təyin edib.

Bu barədə məlumatı Yelisey Sarayı yayıb.

“Le Monde”də yayılan məlumatda bildirilib ki, Sebastian Lekornu Baş nazir postuna hələ 2024-cü ilin 13 dekabrında təyin olunmalı idi. Lakin Elizabet Borndan sonra Qabriel Attal, Mişel Barnye və Fransua Bayru Baş nazir seçiliblər. Hər halda Fransua Bayru etimadı doğrultmayıb, S.Lekornu isə nazir postunda 8 il fəaliyyət göstərib. Lakin fransızlar arasında elə də populyar deyil.

Əslən Normandiyadan olan S.Lekornunun atası aviasiya texniki, anası isə tibb bacısı olub. S.Lekornu 16 yaşında xalq hərəkatı birliyinə rəhbərlik etmək üçün mübarizəyə qoşulub. Ardınca isə Respublikaçıları təmsil edib. 22 yaşında deputat köməkçisi təyin olunub. 23 yaşında hökumət üzvünün ən gənc köməkçisi kimi tarixə düşüb. 2014-cü ildə Vernon meri seçilib.

Fransanın keçmiş müdafiə naziri olan S.Lekornu 2017-ci ildən hökumətdə təmsil olunur və E.Makronun yaxın müttəfiqlərindən sayılır.

Ekspertlərin fikrincə, hazırda onun missiyası hökumətin sarsılmış etimadını bərpa etmək və E.Makronun diz çökmüş nüfuzunu ayağa qaldırmaqdır.