Ukraynada döyüşlər şiddətləndi: sakinlər evlərini tərk edir

Ukraynanın Xarkov vilayətinin ötən il işğaldan azad edilən əraziləri yenidən Rusiyanın hücumuna məruz qalıb.

Məlumata görə, sakinlər son günlər Rusiya Ordusunun bu istiqamətdə hücumları kəskinləşdirməsi səbəbi ilə vilayətin Kupyansk və Dvureçnoye rayonlarından çıxarılırlar.

Bununla yanaşı, Ukraynanın Rusiya ilə sərhədi boyu qəsəbələrdən də sakinlər təxliyə olunurlar.

Təxliyə olunanlar öz müraciətləri əsasında Qızıl Xaç Təşkilatı tərəfindən dəhlizlər vasitəsilə çıxarılırlar. Sakinlər davamlı atəş altında qalan evlərini tərk edib, naməlum istiqamətə yollanırlar.

“Hər gün atəş altındayıq. İndi evimizi tərk edib, Xarkov şəhəri istiqamətində gedirik. Harada yaşayacağımızı bilmirik. Artıq burada yaşamaq mümkün deyil. Hər gün ruslar buranı vururlar”, – təxliyə olunan sakin deyib.