"Yarısını özü yeyib, yarısını da..." | Gəncədəki hadisə barədə təcili açıqlama - Baku TV

Gəncədə məktəblilər dönərdən zəhərlənib. Hadisə dekabrın 9-da axşam saatlarında qeydə alınıb.

Mirzə Şəfi Vazeh adına 16 nömrəli tam orta məktəbin 8 şagirdi təhsil müəssisəsinin yaxınlığındakı dönərxanadan alınan dönəri yedikdən sonra zəhərlənib.

Abbas Səhhət adına xəstəxananın Yoluxucu xəstəliklər şöbəsinə hospitalizasiya olunan şagirdlərə zəruri tibbi xidmətlər göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar.

Dönərxananın sahibi Elnur Nəsibov şagirdlərin dönəri aldıqdan sonra saxlanma qaydasını pozduqlarını iddia edib:

“Dünən iki şagird gəlib 30 dönər götürdü, bu, kameralarda da var. 30 nəfərdən 8-də zəhərlənmə olub. Məndə olan məlumata görə, şagirdlərin çoxu dönəri aldıqdan sonra gec yeyib. Dönər hazır olandan sonra 30 dəqiqə ərzində yeyilməlidir. Hətta bir nəfər dönərin yarısını qardaşına belə aparıb”.

Məsələ ilə bağlı Azərbaycan Qida Təhlükəsizliyi Agentliyi tərəfindən müvafiq qurumların əməkdaşları ilə birgə araşdırmalar aparılır.

Agentliyin müfəttişləri hadisənin baş verdiyi “Nur” dönərxanasına baxış keçirib, nümunələr götürülərək laborator müayinələrə cəlb olunub, dönərxananın fəaliyyəti məhdudlaşdırılıb.