"Qalatasaray" "Real"ın ulduzunu heyətinə qatacaq

“Qalatasaray” klubu “Real Madrid”in aparıcı futbolçularından Naço Fernandesi heyətinə qatmağa hazırlaşır.

Müdafiə xəttini gücləndirməyi planlaşdıran “sarı-qırmızılar” müqaviləsi yayda başa çatacaq Naçonu azad agent kimi dəvət etmək niyyətindədir. Ancaq bu təklifi nəzərdən keçirən N.Fernandes hələ ki, qərar verməyə tələsmir. “Kral klubu”ndan getməyə hazırlaşan futbolçu Avropanın digər klublarından da təkliflər gözləyir.

Qeyd edək ki, “Real”ın yetirməsi olan Naço Fernandes karyerası ərzində yalnız doğma komandasında çıxış edib. Bütün yarışlarda 355 matç keçirən futbolçu La liqada 3, Çempionlar liqası, klublararası dünya çempionatı və İspaniya superkubokunda 5, UEFA superkubokunda 4, İspaniya kubokunda isə 2 dəfə qalib gəlib.

Müdafiənin bütün zonalarında oynaya bilən N.Fernandesin “transfermarkt” portalına əsasən hazırkı dəyəri təqribən 4 milyon avrodur.